1Jo 4 | KYG | STEP | Nahau'niya vaya'nimogitapae, Asole aigofe vaya'mogi gemo ae'a hakalo hu'a hapa nepaiya vaya'mo muki ma mopafi'mo umenitata nehae. Umenitata nehayanagi lama gemo nehae, hutapa o'afitapa alagepa huta alita fako hutapa afitetapae'mo, Gotitegati'mo e'nafi o'me'nafi, hutapa afiyo.

1 John 4

Goti Auneme'a'e hosu apaune'apame'efe'mo apava gemo hu'niya gemae

1 Nahau'niya vaya'nimogitapae, Asole aigofe vaya'mogi gemo ae'a hakalo hu'a hapa nepaiya vaya'mo muki ma mopafi'mo umenitata nehae. Umenitata nehayanagi lama gemo nehae, hutapa o'afitapa alagepa huta alita fako hutapa afitetapae'mo, Gotitegati'mo e'nafi o'me'nafi, hutapa afiyo. 2 Muki vaya'mogimo, Yesu'a Kalaisi vekamo mai'neno ma mopafi vaya'ai apakufagana agufamo aliteno vemo hamale'niye, hu'a nehaya vaya'mo Goti Auneme'amo ali'nae. Lapakaemo ani kavateti'mo age'nayana Goti Auneme'amo apaipafi'mo mai'niye, huta agetapa aeto hu'nae. 3 Muki vaya'mogimo, Yesu'a Kalaisi vekamo mai'neno ma mopafi vaya'ai apakufagana agufamo aliteno vemo hamale'niye, hu'a nosaya vaya'mo Goti Auneme'amo o'ali'nae. Apakaemo Yesu kame'amo auneme'amo ali'nae. Lapakaemo, hogotetapa ani auneme'amo egaiye, hutapa afi'nageno'ae'mo ago e'niye. 4 Aise mafa'ne'nimogitapae, lapakaemo Goti mafa'ne'amo mai'netapae'mo aigofe vaya'aina ago aeta apakase'nae. Lapaipafi'mo mai'niya Auneme'amo'a ma mopafi vaya'ai apaipafi'mo mai'niya auneme'amo ago aeno agaseno mai'niya'mofe'mae. 5 Apakaemo ma mopafi vaya'mo mai'naya'mofe'mo ma mopafi kavafeke'mo ava gemo hu'a hapa nepaige'apae'mo ma mopafi vaya'mogi ne'afiye. 6 Lagaemo Goti vaya'amo mai'none. Goti'a age'a aeto hu'naya vaya'mogimo getimo ne'afiye. Goti vaya'amo o'mai'naya vaya'mogimo getimo no'afiye. Ani kavatefe'mo lama ge aepa Auneme'amo agege aigofe gemo aepa auneme'amo agege huta agegaune.

Goti'a hau ayamopafi'mo hau'niya vekae'mo ava gemo hu'niya gemae

7 Nahau'niya vaya'mogitapae, Hapau apayamopafi'mo nehapaiya kava'mo aepa vekamo Goti'a mai'niya'mofe'mo konagatimogife'mo lahau layamopafi'mo lahaino. Muki vaya'mo hapau apayamopafi'mo nehapaiya vaya'mo Goti'a alino apate'nige'a mafa'ne'amo mai'ne'a Goti'a ago age'a aeto hu'nae. 8 Goti'a hau ayamopafi'mo nehaiya vekamo mai'niya'mofe'mo hapau apayamopafi'mo nohapausiya vaya'mogimo Goti'a age'a aeto osu'nae. 9 Goti'a Yesuteti'mo afa'a maisuna ya'mo alisunafe'mo aiya magoke mafa'ne'amo alino ate'nigeno ma mopafi'mo emine'niye. Goti'a ani kavateti'mo lagaefe'mo hau ayamopafi'mo hau'niya kava'amo alino lave li'niye. 10 Ala alagepa kava'mo'a hane'niyana lagaemo Gotife'mo lahau layamopafi'mo olahau'niya'monanafa Goti'a lagaefe'mo hau ayamopafi'mo hau'niye. Agaemo lagaefe'mo hau ayamopafi'mo hau'nisigeno aipamo'mo falu huno latesiyafe'mo Mafa'ne'amo alino ate'nigeno emineno hosu kavatilefe'mo falino miya faino late'niye. 11 Nahau'niya vaya'mogitapae, Goti'a lagaefe'mo hau ayamopafi'mo hau'niya'mofe'mo konagatimogife'mo lahau layamopafi'mo lahaino. 12 Mago vekamo'a Goti'mo mago afina'mo o'age'niye. Lagaemo konagatimogife'mo lahau layamopafi'mo nelahaisiyana Goti'a lagaepi'mo alagi mai'nigeno hau ayamopafi'mo hau'niya kava'amo laipafi'mo kosino afu le'niye.

13 Goti Auneme'amo ago alino lami'niya'mofe'mo ani kavateti'mo ago age'nonana agaepi'mo alagi mai'nonageno lagaepi'mo alagi mai'niye. 14 Lagaemo Afotimo'mo Mafa'ne'amo'mo muki ma mopafi vaya'ai apakufamo alino katino apatesiyafe'mo alino ate'nigeno emine'niye, huta agetetae'mo aeta hakalo huta hapa nepaune. 15 Goti'a muki vaya'mogi, Yesu'a Goti mafa'ne'amo mai'niye, hu'a ae'a hakalo hu'a hapa nepaiya vayapi'mo alagi mai'nige'a apakaemo agaepi'mo alagi mai'nae. 16 Goti'a lagaefe'mo hau ayamopafi'mo hau'niye, huta afitetae'mo ani kavafe'mo lagesa afita fatago nehune. Goti'a hau ayamopafi'mo nehaiya vekamo mai'niye. Hau ayamopafi'mo hau'niya kavapi'mo alagi mai'nisaya vaya'mo Gotipi'mo alagi ne'maigeno Goti'a apakaepi'mo alagi ne'maiye. 17 Goti'a agoti huno apatesiya afina'mo lagaemo koli osisunafe'mo Goti'a lagaefe'mo hau ayamopafi'mo hau'niya kava'amo'mo laipafi'mo kosino ago afu le'niye. Hemenimo Kalaisi'a mai'niya kava huta ma mopafi'mo mai'nona'mofe'mo agoti huno apatesiya afinafe'mo koli osugune. 18 Goti'a lagaefe'mo hau ayamopafi'mo hau'niye, huta huteta agaefe'mo lahau layamopafi'mo lahau'nisiyana koli nosune. Haino hapai'niya hau ayamopafi'mo hau'niya kava'aleti'mo koli nehuna kavatimo laipafati'mo alino ne'atale. Koli nehaya kava'mo aepa'amo hane'niyana hosu kava'mo nehuna'mofe'mo hosu miyatimo aligune, hu'a apakesamo ne'afiye. Goti'a hau ayamopafi'mo hau'niya kava'amo'mo koli nehaya vaya'ai apaipafi'mo kosino afu nole. 19 Goti'a hogoteno lagaefe'mo hau ayamopafi'mo hau'niya'mofe'mo lagaemo Gotife'mo lahau layamopafi'mo nelahaiye.

20 Mago vekamo'a, Nagaemo Gotife'mo nahau nayamopafi'mo ne'nahaiye, huno nehuno'ae'mo konaga'amogife'mo alagi nohaisiyana aigofe vekamo mai'niye. Agaemo age'niya konaga'amofe'mo nohaisiyana haiya kava huno o'age'niya Gotife'mo hau ayamopafi'mo haugiye. 21 Goti'a mani ke'aepa ge'ae'mo, Lapakaemo Gotife'mo lapau lapayamopafi'mo nelapaisigeno konagatapimogi'efe'mo lapau lapayamopafi'mo lapaino, huno laha pai'niye.